حضرت فاطمہ زہرا سلام اللہ علیہا کی سیرت تزکیۂ نفس، اخلاص اور پاکیزہ کردار کا نمونہ ہے؛ مولانا محمد معراج خاں رنوی

حوزہ نیوز ایجنسی کی رپورٹ کے مطابق،چنئی/ امام جمعہ پیرس، چنئی، تمل ناڈو، حجۃ الاسلام والمسلمین مولانا محمد معراج خاں رنوی نے اپنے پیغامِ جمعہ میں حضرت فاطمہ زہرا سلام اللہ علیہا کی سیرتِ طیبہ کی روشنی میں تزکیۂ نفس، اخلاص، ایثار، صبر و استقامت اور حقوق العباد کی ادائیگی کی اہمیت پر زور دیتے ہوئے کہا کہ روح کی حقیقی پاکیزگی انسان کے باطن کی اصلاح، نیت کی درستگی اور کردار کی بلندی سے وابستہ ہے۔

مولانا محمد معراج خاں رنوی نے کہا کہ حضرت فاطمہ زہرا سلام اللہ علیہا کی حیاتِ مبارکہ پوری انسانیت کے لیے روحانی تربیت اور اخلاقی اصلاح کا روشن نمونہ ہے۔ آپؑ کی سیرت یہ درس دیتی ہے کہ عبادت کا اثر انسان کے اخلاق، معاملات اور معاشرتی رویّوں میں نمایاں ہونا چاہیے۔ اللہ تعالیٰ سے مضبوط تعلق، خدمتِ خلق اور دوسروں کے حقوق کا احترام ایک پاکیزہ شخصیت کی بنیادی خصوصیات ہیں۔

انہوں نے اخلاصِ نیت کی اہمیت بیان کرتے ہوئے کہا کہ عبادت، صدقہ و خیرات اور خدمتِ خلق کا مقصد اللہ تعالیٰ کی رضا کا حصول ہونا چاہیے، نہ کہ شہرت یا ذاتی مفاد۔ نماز، تلاوتِ قرآن، دعا اور ذکرِ الٰہی جہاں روحانی ترقی کا ذریعہ ہیں، وہیں انسان کے باطن کی اصلاح اور اخلاقی تربیت میں بھی اہم کردار ادا کرتے ہیں۔

مولانا محمد معراج خاں رنوی نے ایثار اور خدمتِ خلق کی اہمیت پر روشنی ڈالتے ہوئے سورۂ انسان کی آیات 8 اور 9 کا حوالہ دیا، جن میں مسکین، یتیم اور اسیر کو اللہ تعالیٰ کی رضا کے لیے کھانا کھلانے کا ذکر ہے۔ انہوں نے واضح کیا کہ یہ تعلیمات انسان کو خود غرضی سے بلند ہوکر ضرورت مندوں کی مدد کرنے اور معاشرے کے کمزور طبقات کے حقوق کا خیال رکھنے کی ترغیب دیتی ہیں۔

انہوں نے مزید کہا کہ صبر و استقامت، حیا، عفت، سچائی اور زبان کی حفاظت پاکیزہ کردار کے بنیادی اوصاف ہیں۔ جھوٹ، غیبت، تہمت اور دوسروں کی دل آزاری سے اجتناب کرکے معاشرے میں باہمی اعتماد، محبت اور احترام کو فروغ دیا جا سکتا ہے۔

حقوق العباد کی ادائیگی کو روحانی تربیت کا لازمی حصہ قرار دیتے ہوئے مولانا محمد معراج خاں رنوی نے کہا کہ والدین کی خدمت، اہلِ خانہ کے حقوق کی رعایت، پڑوسیوں کے ساتھ حسنِ سلوک، معاملات میں دیانت داری اور ضرورت مندوں کی مدد ایک ذمہ دار مسلمان کی زندگی کے اہم تقاضے ہیں۔ انہوں نے اس بات پر زور دیا کہ انسان کو روزانہ اپنا محاسبہ کرتے ہوئے اپنی غلطیوں کی اصلاح اور کردار کو بہتر بنانے کی کوشش کرنی چاہیے۔

مولانا محمد معراج خاں رنوی نے اپنے پیغام میں تاکید کی کہ حضرت فاطمہ زہرا سلام اللہ علیہا کی سیرت سے حقیقی استفادہ اسی وقت ممکن ہے جب اخلاص، عبادت، ایثار، صبر، پاکیزگی اور حقوق العباد کی تعلیمات کو عملی زندگی کا حصہ بنایا جائے۔ ان کے مطابق، روح کی پاکیزگی ایک مسلسل جدوجہد ہے، جو انسان کو اللہ تعالیٰ سے قریب کرنے کے ساتھ اسے اخلاقی طور پر مضبوط اور معاشرے کے لیے مفید بناتی ہے۔